सियारी गाउँपालिकाले ठेक्का लगाई नदीजन्य पदार्थ उत्खनन् भइरहेको स्थानमा सृजित स्थानीयबासीहरुको विरोध र उक्त स्थानमा रहेको विद्युत प्रशारण लाईनको ल्याटिक टावरको सुरक्षा लगायतका विषयमा छलफल गरी नदीजन्य सामग्री निकाल्दा नदीको नेचुरल फ्लो क्यानलिङ हुने गरी व्यवस्थित तरिकाले निकाल्ने, विद्युतको टावर अगाडिको स्थानमा ग्याभियन पर्खाल लगाई टावरको सुरक्षा गर्ने निर्णय गरिएको छ ।

तिलोत्तमा नगरपालिका वडा नम्बर १४ सँग सिमाना जोडिएको उक्त घाटमा रहेको विद्युत प्रसारण लाइन जोखिममा परेपछि त्यसको सुरक्षाका लागि विद्युत प्राधिकरण बुटवल ग्रिड महाशाखा, सियारी गाउँपालिका र तिलोत्तमा नगरपालिका समेतको त्रिपक्षीय लगानीका लागि छलफल गरी संरक्षणात्मक प्रबन्ध तत्काल गर्ने निर्णय समेत गरेको छ ।

तिनाउ नदीको तिलोत्तमातर्फको किनार हुँदै बुटवलदेखि मैनहियासम्म १३२ केभी विद्युत प्रसारण लाइन लगिएको छ । उक्त विद्युत प्रशारण लाईनको संरक्षण तथा ठक्का लगाइएको नदीजन्य सामग्रीको उत्खनन्मा असर नपर्ने गरी काम गर्ने विषयमा छलफल भएको प्रमुख जिल्ला अधिकारी गणेश अर्यालको भनाइ छ ।