सत्ता गठबन्धन दलबीच भएको केन्द्रीय सहमति अनुसारमा लुम्बिनीमा नेकपा माओवादी केन्द्रले मुख्यमन्त्रीको पद पाउने भएको छ ।
नेकपा माओवादी केन्द्रका लुम्विनी प्रदेश अध्यक्ष सुदर्शन बरालले लुम्विनी प्रदेशमा नेकपा माओवादी केन्द्रको नेतृत्वमा सरकार बनाउने सहमती भएको बताए।
नेकपा एमाले अध्यक्ष र नेकपा माओवादी केन्द्रका अध्यक्ष एवं प्रधानमन्त्री पुष्पकमल दाहाल प्रचण्डका बिचमा भएको सहमती अनुसार महरा लुम्विनी प्रदेशको मुख्यमन्त्री बन्ने बरालले बताए ।
उनी रोल्पा क्षेत्र नम्बर १ (१)बाट निर्वाचित हुन् । महरा यसअघि एमाले नेता लीला गिरी नेतृत्वको सरकारमा अर्थमन्त्री बनेका थिए ।
माओवादीले फागुन २३ गते समर्थन फिर्ता लिएपछि कांग्रेसका मुख्यमन्त्री चौधरी अल्पमतमा छन् । चैत २२ गतेभित्र मुख्यमन्त्री चौधरीले विश्वासको मत लिनुपर्छ । तर, नयाँ गठबन्धनमा एमाले, माओवादी, जसपा, नेकपा एस र एक जना ‘माओवादीनिकट’ स्वतन्त्र प्रदेश सभा सदस्यलाई समेटेर सरकार बनाउने तयारी भइरहेको छ । सत्तापक्षका दलहरूले नागरिक उन्मुक्तिले पनि माओवादी नेतृत्वमा बन्ने सरकारलाई समर्थन गर्ने दाबी गर्दै आएका छन् । तर, नागरिक उन्मुक्ति भने अनिर्णित छ ।
८७ सदस्यीय लुम्बिनी प्रदेशसभामा राप्रपाका एक प्रदेशसभा सदस्य निलम्बनमा परेपछि अहिले ८६ कायम छ । सरकार गठन गर्न कम्तीमा ४४ प्रदेशसभा सदस्य आवश्यक पर्छ । लुम्बिनीमा एमालेका २९, कांग्रेसका २७, माओवादीका सभामुखसहित ११, नागरिक उन्मुक्तिका ४, राप्रपा, लोसपा, जनमत र जसपाका ३/३, राष्ट्रिय जनमोर्चा, नेकपा एकीकृत समाजवादीका १/१ र स्वतन्त्रबाट १ प्रदेशसभा सदस्य निर्वाचित छन् ।
