भोली बिहीबार मनाउन लागिएको वार्षिकोउत्सवको सम्पूर्ण तयारी पुरा भएको बुधबार पत्रकार सम्मेलन गरी जानकारी गराइएको छ । प्रधानमन्त्री पुष्पकमल दाहाल प्रचण्डले वार्षिकोउत्सव कार्यक्रम उद्घाटन गर्ने अस्पतालका अध्यक्ष तथा बुटवल उपमहानगरपालिकाका मेयर खेलराज पाण्डेयले जानकारी गराएका छन् ।

वार्षिकोउत्सवकै अवसरमा प्रधानमन्त्री पुष्पकमल दाहाल प्रचण्डले अस्पतालको थप २ सय शैया भवनको शिलान्यास र शैक्षिक कार्यक्रमको सुभारम्भ गर्नुहुने कार्यक्रम तय भएको अध्यक्ष पाण्डेयले बताए ।

उक्त पत्रकार सम्मेलनमा बोल्दै अध्यक्ष खेलराज पाण्डेयले १ सय शैयाको अस्पतालको स्तरोन्नती गरी ३ सय शैयाको अस्पताल बनाउने तयारी भएको बताए । समयको माग अनुसार अस्पतालको स्तरवृद्वि गरी आमा सुरक्षा कार्यक्रम सञ्चालन गरिने जानकारी गराए ।

अस्पतालमा आमा सुरक्षा कार्यक्रम यसै वर्षदेखि संचालन हुने गरि नगरपालिकाबाट बजेट विनियोजित भएकोसमेत अध्यक्ष पाण्डेयले जानकारी गराए ।

यसै शैक्षिक सत्रदेखी प्रमाणपत्र तह नसिंङ, सामान्य चिकित्सा (एचए) र डिप्लोमा इन फार्मेसी गरी तीन वटा विषयको शैक्षिक कार्यक्रम संचालन गर्ने तयारी भएको उनले बताए ।

उनकाअनुसार ३ वटा विषयमा ४०÷४० जनाका दरले १२० जना विद्यार्थीले यस वर्ष अध्ययन गर्ने छन् । विद्यार्थीलाई अध्ययन शुल्क अन्यमा भन्दा २० प्रतिशत कम गरिने छ ।

आर्थिक वर्ष २०७९÷८० मा ७० हजार ४८६ जनालाई सेवा प्रदान गरिएको अस्पतालले बताएको छ । पछिल्लो दशक आर्थिक वर्ष २०७०÷०७१ देखि आर्थिक वर्ष २०७९÷०८० सम्म ६ लाख २१ हजार ९ सय ४२ जना विरामीले अस्पतालबाट सेवा लिएको अस्पतालले जनाएकाे छ ।