नगरप्रमुख खेलराज पाण्डेयले नगदसहित साउनयता जन्मिएका शिशुलाई पोषण सामग्रीसमेत हस्तान्तरण गरे । आमा र नवजात शिशुको स्वास्थ्यमा सुधार ल्याउनका लागि पोषण भत्ता प्रदान गर्ने कार्यक्रम ल्याइएको उनले बताए । बुटवल उपमहानगरपालिकाभित्र लुम्बिनी प्रादेशिक अस्पताल, आम्दा अस्पताल र सेमलार स्वास्थ्यचौकीमा प्रसूति सेवा सञ्चालनमा छ ।

त्यसमध्ये जुनसुकै स्वास्थ्य संस्थामा सुत्केरी भए पनि उनीहरुले प्रोत्साहन रकम पाउनेछन् । सुरक्षित सुत्केरी हुन सघाउँदै उनीहरुको स्वास्थ्यबारे जानकारी लिँदै आत्मबल बढाउन र हौसला प्रदान गर्नका लागि नगद प्रोत्साहन कार्यक्रम सुरु गरिएको बुटवल उपमहानगरपालिकाकी उपप्रमुख सवित्रादेवी अर्यालले बताइन् ।

यसभन्दा अघि उपप्रमुख घरमै गएर घ्यु, ज्वानो दिनेलगायत दिन कार्यक्रम भए पनि त्यसलाई परिमार्जन गर्दै यस वर्षदेखि नगद प्रोत्साहन ल्याएको हो । बुटवल उपमहानगरपालिकाभित्र वार्षिक करिब ३ हजार ५ सय सुत्केरी हुन्छन् । यस वर्षको जेठ मसान्तसम्म ३ हजार १ सय ५० जना सुत्केरी भएका छन् ।

बुटवल उपमहानगरमा अघिल्लो आर्थिक वर्षमा एक सुत्केरी आमाको मृत्यु भएको थियो । विपन्न वर्गका धेरै सुत्केरीमा कुपोषण देखिएका बेला नगद प्रोत्साहनले त्यस्ता महिलाको पोषण र स्वास्थ्यमा सहयोग हुने स्वास्थ्य शाखा प्रमुख युवराज पाण्डेले बताए ।