पाल्पाको दोभान खोलामा डुबेर एक जनाको मृत्यु भएको छ । रुपन्देहीको बुटवल उपमहानगरपालिका–११, श्रृजनानगर बस्ने ३४ वर्षीय लोकबहादुर रजाली मगरको पौडी खेल्ने क्रममा शनिबार बेलुकी खोलामा डुबेर मृत्यु भएको जिल्ला प्रहरी कार्यालय पाल्पाका सूचना अधिकारी बीरेन्द्र थापाले जानकारी दिए ।
तिनाउ गाउँपालिका–२, खुर्साने नजिकै दोभान (कचलखोला) खोलामा साथीहरुसँग वनभोज खान आएका रजाली मगर बेलुकी फर्किन क्रममा नभेटिएपछि खोजतलाज गर्दै जाँदा पौडी खेल्ने क्रममा पानीमा डुबेको अवस्थामा भेटिएका थिए ।
तत्काल उपचारका लागि प्रादेशिक अस्पताल बुटवल लगिएकामा चिकित्सकले मृत घोषणा गरेको प्रहरीले जनाएको छ । घटनाको प्रहरी चौकी दोभान र जिल्ला प्रहरी कार्यालयबाट थप अनुसन्धान भइरहेको छ ।
