राष्ट्रिय लोक भजन चुड्का संरक्षण प्रतिष्ठान नेपालको तेस्रो महाधिवेशन नयां नेतृत्व चयन गर्दै बुटवलमा सम्पन्न भएको छ। सनिवारदेखि सुरु भएको महाधिवेशन नयांव नेतृत्व चयन गर्दै आईतबार सम्पन्न भएको हो। महाधिवेशनले बुटवलका नारायण खनाल लेकालीको अध्यक्षतामा ३१ सदस्यीय नयां नेतृत्व चयन गरेको छ। जसको वरिष्ठ उपाध्यक्षमा प्रेम अधिकारी, महिला उपाध्यक्षमा सावित्री त्रिपाठी, खुल्ला उपाध्यक्षमा भुला प्रसाद भण्डारी र महासचिवमा खगेन्द्रराज पराजुली निर्वाचित भएका छन्।
त्यसैगरि उपमहासचिवमा नारायण प्रसाद भुसाल, सचिवमा प्रशासनिक तर्फ भरतन्द्र गौतम र सांगठनिकतर्फ टिकाराम लुईटेल निर्वाचित भए भने कोषाध्यक्षमा सरला पाण्डे र सहकोषाध्यक्षमा तारा थापा निर्वाचित भए। नवनिर्वाचित अध्यक्ष लेकालीले हराउंदै पुराना र मौलिक संस्कृतिको रुपमा रहेका भजन तथा चुड्काहरुको संरक्षण गर्दै यसको संरक्षणमा लागेका सर्जग तथा कलाकारहरुको हक हित र अधिकारको पक्षमा काम गर्ने बताए।
नेपालको पुरानो र मौलिक संस्कृतिको रुपमा रहेको भजन तथा चुड्काहरुको संरक्षण गर्दै नयां पुस्तामा हस्तान्तरण गर्ने उद्देश्यले २०६७ सालमा प्रतिष्ठानको स्थापना गरिएको थियो। सर्जग तथा लोक गायक प्रजापती पराजुली संस्थापक अध्यक्ष रहेको प्रतिष्ठानमा हाल ५१६ जना आजिवन र ४ सय साधारण सदस्य रहेका छन्। महाधिवेशनको राष्ट्रिय सभाका अध्यक्ष गणेश तिमिल्सेनाले सनिवार उद्घाटन गरेका थिए।
