७० को दशक वाट अब ८० को दशकमा पाइला टेक्दै छौँ । पछिल्लो दशकमा हामीले धेरै उतारचढाव अनि रुपान्तरणहरु देख्यौँ । चाहे भूकम्प होस् या संविधान, अनेक ग्रह गोचर, अनेक कल्पना भित्र र बाहिरका कुराहरू सहित यस दशकले बिदा मागेको छ ।

आज सूर्यले मीन राशिको भोग समाप्त गरी मेष राशिबाट भोग शुरु गर्ने दिन हो ।
यस दिनलाइ वैशाख सङ्क्रान्ति अर्थात मेष सङ्क्रान्ति तथा वर्षको जेठो दिनको रूपमा लिने गरिन्छ । विक्रम ६० संवत सरमध्ये एक र आदित्य सूर्यसंग सम्बन्धित भएकाले यसलाई विक्रमादित्य संवत भनिएको हो । सूर्य मेष राशिमा प्रवेश गर्दा शुरु भएर मीन राशि छोड्दा यो संवत्को पूरानो वर्ष सकिएर नयां वर्ष शुरू हुने भएकाले वैज्ञानिक रहेको विद्वानहरुको भनाइ छ । सौरमान र चान्द्रमानको समन्वय पनि यो संवतमा भएको छ ।
कलियुग शुरु भएको तीन हजार ४४ वर्षपछि विक्रम संवत शुरू भएको हो । हरेक व्यक्तिले आज गत वर्ष गरेका कामको सफलता र असफलता मुल्याकंन गरी असफलता दोहोरिन नदिने र सफलता प्राप्त गर्न योजना निर्माण एवं संकल्प गर्दछन ।
आज बिहानै नुहाउने, घरकोठा–आँगन सफा गर्ने, मीठोमीठो खाने, साथीभाई तथा इष्टमित्रसंग भेटघाट गरी एकापसमा शुभकामना व्यक्त गर्ने गरिन्छ । नयां वर्षका अवसरमा नेपालभरका सरकारी कार्यालय, सार्वजनिक संस्थान एवं शिक्षण संस्थामा सार्वजनिक बिदा दिने चलन छ ।

नयां बर्ष २०८० को अवसरमा तिनाउ न्यूज परिवार सम्पूर्ण पाठक, विज्ञापनदाता र सुभेच्छुकहरूको लागि नयां बर्ष सुखमय बनोस भन्ने कामना गर्दछ ।