बुटवल । बुटवल, भैरहवा लगाएतका स्थानमा अव राईड सेयरिङ सेवा ‘ट्याव गो’ सञ्चालन हुने भएको छ । काठमाडौंमा प्रधान कार्यालय रहेको ट्याव गो सोलुसन प्रा.लि नेपालले बुटवल, भैरहवामा लगाएतका क्षेत्रमा राईड सेयरिङ सेवा सञ्चालन गर्न लागेको हो ।
अहिले कम्पनीले टेक्निकल काम गरिरहेको छ भने ट्याक्सी दर्ताको काम भइरहेको कम्पनीका बुटवल प्रमुख अर्जुन तिवारीले बताए । यात्रुहरुलाई सर्वसुलभ मुल्यमा सुरक्षित यात्रा गराउने उद्देश्यले राईड सेयरिङ सेवा ‘ट्याव गो’ सुरु गर्न लागेको उनले बताए । यो सेवा बुटवल, भैरहवा पछि बर्दघाट, कपिलबस्तुको ४ नं., चन्द्रौटा क्षेत्रमा विस्तार हुने उनको भनाई छ ।
मोबाईलमा ‘ट्याव गो’ एप डाउनलोड गरेपछि सर्वसाधारणले मोटरसाईकल, अटो र ट्याक्सी लाई आफूले चाहेको ठाउँमा बोलाउन सक्नेछन । बुटवल र भैरहवाको मुख्य बजारबाट जिल्ला भित्रका जुनसुकै स्थानबाट आफूलाई जानुपर्ने गन्तब्य उल्लेख गरेर आग्रह गरिएपछि नजिकैको ट्याक्सी, मोटरसाईकल तथा अटो यात्रु सामु आईपुग्छ । ट्याव गो सोलुसन प्रा.लि नेपालले आफ्नो यात्रुहरुको सुरक्षा र उनीहरुको सामानको सुरक्षालाई विशेष ध्यान दिइने जनाएको छ । ट्याक्सी चालकको सबै विवरण कम्पनीसँग हुने छ । यात्रु कुनै पनि सवारीमा चढेपछि मात्रै बिल चढ्न सुरु हुने कम्पनीले जनाएको छ ।
हाल ट्याक्सी, अटो र मोटरसाईकल बाट यो सेवा दिने कम्पनीले जनाएको छ । ट्याक्सीका लागि प्रति किलोमिटर ५५ रुपैयाँ मुल्य तोकिएको छ भने अटोका लागि प्रतिकिलोमिटर ३२ र मोटरसाईकलका लागि प्रति किलोमिटर १८ रुपैया निर्धारण गरिएको उनले बताए । ट्याक्सी र अटो कालो नंं प्लेट भएका प्रा.लिमा आबद्ध भएका छन भने मोटरसाईकल नीजि आबद्ध हुनेछन् । मोटरसाईकलका लागि आवेदन प्राप्त भइरहेको आवश्यकता अनुसार छनोट गरिने कम्पनीका बुटवल शाखाका कर्मचारी बुद्धिप्रसाद घिमिरेले बताए । बुटवल, भैरहवा क्षेत्रका लागि पहिलो चरणमा करिब तीन सय ट्याक्सी मार्फत सेवा दिन लागिएको उनले बताए । त्यस्तै अटो १५० र मोटरसाईकल २ सय वटा सेवा दिईने उनको भनाई छ ।
कम्पनीले यात्रु र चालकको विमा समेत गरेको छ । हाल एन्वएड मात्र सार्वजनिक भएको ‘ट्याव गो’ एप केही दिनमै एप स्टोरमा उपलब्ध हुने कम्पनीका अर्का सदस्य सोमनाथ अर्यालले जानाकारी दिए । बुटवल, भैरहवा लगाएतका शहरमा बैशाख भित्र नै यो सेवा सुरु गर्ने तयारी भएको उनको भनाई छ ।
