बुटवल ।पूर्व अर्थमन्त्री विष्णु पौडेलले मुलुकको अर्थतन्त्र गम्भिर र जटिल स्थितीमा पुगेको बताएका छन् । पश्चिम नेपाल वस व्यवसायी प्रा.लिको तेस्रो साधारण सभामा बोल्दै उनले अहिले मुलुकको आर्थिक अवस्था गम्भिर बनेको र आन्तरिक राजश्वले कर्मचारीलाई तलव दिन नसक्ने अवस्थामा पुगेको बताए ।
‘अहिले साधरण खर्च राज्यको आन्तरिक खर्च बाट व्यवस्थापन गर्न कठिन छ । अहिलेको राजश्वले साधारण खर्च पनि धान्न सकेको छैन् । पेन्सन, कर्मचारीलाई तलव, सामाजिक सुरक्षा व्यवस्थापन समेत कठिन बनेको छ’ उनले भने ।
रुपन्देही क्षेत्र नं. २ का सांसद समेत रहेको पौडेलले विदेशी मुद्रा संचिती र रेमिटान्समा केही सुधार भएपनि अझै पनि राजश्व परिचालन हुन नसकेको बताए ।
साथै मुलुकमा राजश्व संकलनको अवस्था आधा शताब्दी पछिकै निराशाजनक अवस्थामा रहेको बताए । गतवर्षको राजश्व संकलनको तुलनामा यो वर्ष उल्लेख्यमात्रा कम राजश्व संकलन भएको उनले भनाई छ। ‘राजश्व परिचलन र संकलनको अवस्था चालु आर्थिक वर्षमा पूरा नहुने मात्र होइन गत वर्षकोभन्दा पनि उल्लेख्य मात्रामा कम राजश्व संकलन भएको छ ।’–पौडेलले भने, यो अवस्था करिब ५० वर्षपहिले नेपालमा देखिएको थियो ।
वि.स. २०२८ सालको घटना स्मरण गराउँदै पौडेलले भने–‘उक्त वर्ष अघिल्लो वर्षको तुलनामा नगन्य मात्रामा कम राजश्व संकलन भएको थियो । ठिक सोही घटना ५० वर्षपछि चालु आर्थिक वर्षमा दोहोरिएको छ ।’ नेकपा एमालेका उपाध्यक्ष समेत रहेका पौडेलले अहिलेको अवस्थामा तत्काल क्रिया प्रतिक्रिया गर्ने अवस्थामा नेपाल नभएको बताउँदे उनले मुलुकको आर्थिक संकट समाधानका लागि सबै दल एउटै प्लेटफर्ममा बसेर लाग्नु पर्नेमा जोड दिए ।
