बुटवल । बुटवल औद्योगिक क्षेत्र उद्योग संघको २१ औँ वार्षिक साधारण सभा तथा ११ औँ अधिवेशनबाट अध्यक्षमा हिरामणी भट्टराई पुनः सर्वसम्मत निर्वाचित भएका छन् ।
अधिवेशन अन्तरगत आगामी कार्यकालको नयाँ नेतृत्व चयनका लागि तय भएको निर्वाचन कार्यक्रम अनुसार बुधवार उम्मेदवारी दर्ता कार्य सम्पन्न भएको थियो । निर्वाचन समितिका संयोजन अधिवक्ता यमलाल खनालका अनुसार निर्वाचन कार्य तालिका अन्तरगत सबै पदमा एकल उम्मेदवारी परेका कारण नया कार्य समिति निर्विरोध निर्वाचित भएको बताए ।
खनालका अनुसार संघको अध्यक्षमा हिरामणी भट्टराई, उपाध्यक्षमा उपेन्द्र अग्रवाल, महासचिवमा प्रज्वल थान्जु, कोषाध्यक्षमा कमल ज्ञवाली, सचिवमा राम प्रसाद ज्ञवाली तथा सदस्यहरुमा यादव प्रसाद भण्डारी, कोसलराज भण्डरी, सुमन अस्याल र विनोदराज न्यौपाने निर्वाचित भएका छन् ।
नवनिर्वाचित नया कार्य समितिलाई प्रदेश प्रमुख अमिक शेरचनले प्रमाण वितरण गरे । बुटवल औद्योगिक क्षेत्रमा सञ्चालनमा रहेका उद्योगहरु सदस्य रहने संघमा ५७ उद्योग आवद्ध रहेका छन् । संघले औद्योगिक क्षेत्रमा रहेका उद्योगहरुको संरक्षण र त्यहा आउने समस्याहरुका बारेमा काम गर्दै आएको छ ।