गण्डकी प्रदेश मुकाम कास्कीको पोखरामा आइतबार दुर्घटनामा परेको यती एयर विमानको ब्ल्याक बक्स फेला परेको छ। विमान दुर्घटनाको करिब २५ घन्टापछि ब्ल्याक बक्स भेटिएको नेपाल नागरिक उड्डयन प्राधिकरणले बताएको हो।
प्राधिकरणका प्रवक्ता जगन्नाथ निरौलाले जहाजको ब्ल्याक बक्स भेटिएको जानकारी दिए। विमान दुर्घटनामा परेलगत्तै खोजी कार्य जारी रहे पनि २५ घन्टापछि मात्रै भेटिएको ब्ल्याक बक्सलाई काठमाडौं ल्याउने तयारी भइरहेको उनले बताए।
ब्ल्याक बक्समा जहाज दुर्घटना हुनुअघि पाइलटले एकआपसमा गरेको कुराकानी रेकर्ड हुने हुँदा यसले दुर्घटनाको कारण पत्ता लगाउन सहजीकरण गर्छ। विमान दुर्घटना हुनुको मूल कारण पनि ब्ल्याक बक्सबाट थाहा पाउन सकिन्छ।
