भैरहवा । जिल्ला प्रहरी कार्यालय रुपन्देहीले भैरहवाका दुई स्पा सेन्टरमा अनुगमन गरेको छ ।
स्पा सेन्टरको नाममा अनौतिक कार्य भइरहेको सूचना पाएपछि रुपन्देही प्रहरीले भैरहवाको आवारोडस्थित हनि स्पा एण्ड सैलुन र बैंक रोडस्थित युनिक स्पा एण्ड सैलुनमा अनुगमन गरेको हो ।
अनुगमनको क्रममा प्रहरीले शंकास्पद क्रियाकलापमा संलग्न रहेको आरोपमा १५ जनालाई नियन्त्रणमा लिएको छ । स्पा सेन्टरमा मापदण्ड विपरितका काम भइरहेको गुनासाका आधारमा अनुगमन गरिएको जिल्ला प्रहरी कार्यालय रुपन्देहीका प्रवक्ता श्यामु अर्यालले जानकारी दिए ।
अनुगमनको क्रममा युनिकबाट ३ महिला र ३ पुरुष गरी ६ जना र हनिबाट ४ पुरुष र ५ महिला गरी १५ जनालाई नियन्त्रणमा लिइएको हो । उनीहरुलाई सम्झाइबुझाइ गरेर छोडिएको उनले अर्यालले बताए ।
स्पा व्यवसाय संचालन सम्बन्धी भएको आचारसंहिता नै पालना नगरी स्पा सेन्टरको नाममा दुरुपयोग गरेकोले पहिलो पटक अनुगमन टोलीले जिल्ला प्रहरी कार्यालयमा ल्याई सचेत गराइ छाडिएको छ । स्पा सेन्टर संचालकलाई समेत मापदण्डमा विपरितका गतिवधी दोहिरीएमा कारवाही गरिने प्रहरी प्रवक्ता अर्यालले भने ।
रुपन्देहीमा पछिल्लो समय स्पा सेन्टरहरु धमाधम संचालनमा छन । कतिपय दर्ता भएपनि अधिकांस दर्ता नभएको पाएपछि नगरपालिकाले पनि करको दायरामा ल्याउन अनुगमन गरिरहेको छ ।
