बुटवल । रुपन्देहीका प्रतिनिधि र प्रदेशसभा निर्वाचनका एक सय ५६ जना उम्मेदवारको जमानत जफत भएको छ ।
निर्वाचनमा खसेको सदर मतको दशप्रतिशत भन्दा कम मत प्राप्त गरेका प्रतिनिधी सभाका ७३ जना र प्रदेश सभाका ८३ जनाको जमानत जफत भएको हो ।
जिल्ला निर्वाचन कार्यालय रुपन्देहीका प्रमुख अयोध्या भण्डारीका अनुसार मङ्सिर ४ मा सम्पन्न प्रतिनिधिसभा र प्रदेशसभाको निर्वाचनमा जिल्लाका पाँच निवाचन क्षेत्रबाट दुई सय तीन जना उम्मेदवार बनेका थिए ।
निर्वाचनमा नौ जनाले उम्मेदवारी फिर्ता लिएका थिए भने तीन जनाको उम्मेदवारी खारेजी भएको थियो ।
निर्वाचन कार्यालयका अनुसार निर्वाचनमा खसेको कुल सदर मतको १० प्रतिशत मत ल्याउन नसक्ने उम्मेदवारको जमानत जफत हुने व्यवस्था छ ।
प्रतिनिधिसभा तथा प्रदेशसभा सदस्य निर्वाचन निर्देशिका, २०७४ अनुासर प्रतिनिधिसभा सदस्यलाई १० हजार तथा प्रदेशसभा सदस्य उम्मेदवारलाई ५ हजार रुपैयाँ धरौटी दाखिला गरेको रकमको धरौटी जफत हुने व्यवथा अनुसार जिल्लाको क्षेत्र नम्बर १ मा १७ जना उम्मेदवारको जमानत जफत भएको छ ।
क्षेत्र नम्बर २ मा १२ जना, ३ मा २० जना, ४ मा १० र क्षेत्र नम्बर ५ मा १४ जना उम्मेदवारको जमानत जफत भएको प्रमुख भण्डारीले बताउनुभयो ।
जिल्लाबाट प्रतिनिधिसभामा निर्वाचित उम्मेदवार विष्णुप्रसाद पौडेल, छविलाल विश्वकर्मा , बासुदेव घिमिरे, दीपक बोहरा, र सर्वेन्द्रनाथ शुक्लाले भने जमानत जोगाउनुभएको छ । यस्तै उम्मेदवारहरु बालकृष्ण खाण, घनश्याम भुसाल, प्रमोद कुमार यादव, भरतकुमार शाहको पनि जमानत जोगिएको छ ।
