पुर्व गभर्नर नेपालले बैंकको स्प्रिड दर घटाउने, आधार दर साढे ७ वा ८ प्रतिशतमा झार्ने र सिडि रेसियो कम गर्ने हो भने बैंकको ब्याजदर घटाउन सकिने नेपालको तर्क छ । अहिले बैंक वित्तीय संस्थाले मुद्दति निक्षेपमा १५ प्रतिशतसम्म ब्याजदर दिंदै आएका छन् भने कर्जाको ब्याजदर १८ प्रतिशतभन्दा माथि पुर्याएका छन् ।

सरकारले आर्थिक सुधारको नीति अवलम्बन गर्नुको साटो केन्द्रीय बैंकसँग निहुँ खोज्ने काम गरेको र केन्द्रीय बैंकले पनि मौद्रिक नीति बनाउँदा अहिलेको अर्थतन्त्रको मूलभूत समस्या संबोधन गर्न चुकेको उनको भनाई छ । कोरोना महामारी तथा रुस-युक्रेन युद्धका कारण मुद्रास्फितिमा चाप पर्दा अर्थतन्त्रमा समस्या आएको विश्लेषण गर्र्दै पुर्व गभर्नर नेपालले भने-“अव अर्थतन्त्र माथि उकास्नका लागि सरकारले बजारमा प्रयाप्त पैसा पठाउनु पर्छ ।”

अर्थतन्त्रमा संकट आएपनि नेपाल श्रीलंकाको अवस्थामा भने नपुग्ने पुर्व गभर्नर नेपालको विश्लेषण छ । “श्रीलंका मुलतः चर्को ब्याजमा लिएको वैदेशिक क्रृणको मारमा परेर संकटमा पुगेको हो, तर नेपालले लिएको वैदेशिक क्रृण सहुलियतपूर्ण ब्याजदरमा छ, ७ अर्वमा झरेको विदेशी मुद्राको संचिती ९ अर्व ३५ करोड पुगेको छ, त्यसैले डराउनुपर्ने अवस्था छैन”–उनले भने ।

सरकार उद्योग स्थापना गर्ने भन्दा पनि राजस्वमुखी भएकाले दीर्घकालका लागि भने समस्या हुन सक्ने उनको विश्लेषण छ । “सरकारले उद्योगी व्यवसायीलाई सहुलियतपूर्ण कर्जामा अरवौं रकम उद्योगी व्यवसायीलाई दिएको छ, तर त्यो उद्योग स्थापनामा लगानी हुन सकेको छैन, सरकारले यसमा जोड दिनुको साटो आयातमा जोड दिएर राजस्व बढी उठाउने नीति लिएको छ, जसले दीर्घकालमा संकट निम्त्याउन सक्छ”–उनले भने ।

कोभिडको असरलगत्तै रुस-युक्रेन युद्धका कारण पेट्रोलियम पदार्थको मूल्य भारीमात्रामा वृद्धि भएको र जसका कारण डलरमा पेट्रोलियम पदार्थको आयात गर्दा वैदेशिक मुद्राको सन्चितीमा गिरावट आएको र राष्ट्रबैंकले यसको अवस्थामा सुधार ल्याउन डलर खर्च गरेर ल्याउनुपर्ने महँगा मालवस्तुको आयात नियन्त्रण गर्नुपर्ने अवस्था आएको भन्दै उनले अव यो धेरै समय नरहने विश्लेषण गरे ।

कार्यक्रममा सहभागी उद्योगी व्यवसायीहरुले चर्को व्याजदरका कारण उद्योगी व्यवसायीहरु ठूलो मारमा परेको भन्दै निकासका लागि पहल गर्न आग्रह गरेका थिए । नेपाल चेम्बर अफ कमर्सका केन्द्रीय सदस्य एजाज आलम, लुम्बिनी प्रदेश अध्यक्ष टंकप्रसाद कंडेल, महासचिव जेपी कंडेल, राष्ट्रिय उद्योग व्यापार संगठन रुपन्देहीका निवर्तमान अध्यक्ष नारायणप्रसाद भण्डारी लगायतले व्यापार व्यवसायमा ५० प्रतिशत ह्रास आएको तर क्रृणको ब्याजदर शतप्रतिशत बढेको भन्दै ब्याजदर घटाउने उपायका बारेमा जिज्ञासा राखेका थिए ।